बारा, १७ अशार । बारामा मोबाइल चोरीको आरोप लगाउँदै चार जना बालबालिकालाई सार्वजनिक स्थलमै रुखमा डोरीले बाँधेर कुटपिट गरेको आरोपमा चार जना महिला पक्राउ परेका छन् ।
जिल्ला प्रहरी कार्यालय बाराका अनुसार घटना मंगलबार बिहान करिब ९ बजे जितपुर–सिमरा उपमहानगरपालिका–१६ स्थित टांगिया बस्तीको सार्वजनिक चौतारामा भएको हो ।
स्थानीय महिलाहरूले मोबाइल चोरी गरेको आरोप लगाउँदै चार जना बालबालिकालाई बरको रुखमा डोरीले बाँधेर निर्घात कुटपिट गरेको सूचना प्राप्त भएपछि प्रहरीले घटनाको अनुसन्धान अघि बढाएको थियो ।
अनुसन्धानका क्रममा घटनामा संलग्न रहेको आरोपमा स्थानीय ६२ वर्षीया मिना रजन मगर, ३२ वर्षीया पवि कुमारी आले मगर, ३० वर्षीया रानिमाया मोक्तान र ४२ वर्षीया निर्मला वाईलाई बुधबार पक्राउ गरिएको जिल्ला प्रहरी कार्यालय बाराले जनाएको छ ।
प्रहरीले पक्राउ परेका चारै जनाविरुद्ध बालबालिकाविरुद्धको कसुर अन्तर्गत मुद्दा दर्ता गरेको छ । जिल्ला अदालत बारा, कलैयाबाट पाँच दिनको म्याद थप अनुमति लिएर घटनाबारे थप अनुसन्धान भइरहेको जिल्ला प्रहरी कार्यालय बाराका सूचना अधिकारी प्रहरी नायब उपरीक्षक -डीएसपी) मिनबहादुर घलेले जानकारी दिएका छन् ।
