काठमाडौं, १७ असार। त्रिभुवन विश्वविद्यालय (त्रिवि) सेवा आयोगको अध्यक्षमा नेपाल सरकारका पूर्वसचिव तथा शहरी योजनाविद् किशोर थापा नियुक्त भएका छन्। कुलपतिले सिफारिस समितिको सिफारिसका आधारमा थापालाई अध्यक्षमा नियुक्त गरेका हुन्।
यस्तै, सेवा आयोगको सदस्यमा प्रा. डा. रेजिना मास्के नियुक्त भएकी छन्। विश्वविद्यालयले आयोगलाई थप प्रभावकारी, पारदर्शी र योग्य जनशक्ति व्यवस्थापनमुखी बनाउने उद्देश्यले यी नियुक्ति गरिएको जनाएको छ।
पूर्वसचिव थापाले नेपाल सरकारका विभिन्न मन्त्रालयमा चार दशकभन्दा बढी समय जिम्मेवारी सम्हालिसकेका छन्। उनी हाल शहरी योजना विज्ञका रूपमा सक्रिय रहनुका साथै काठमाडौं विश्वविद्यालयमा भिजिटिङ फ्याकल्टीका रूपमा पनि आबद्ध छन्।
