काठमाडौं, १५ असार । त्रिभुवन विश्वविद्यालयले आफ्ना आंगिक क्याम्पसहरूलाई दलीय विद्यार्थी संगठनका संरचना हटाउन निर्देशन दिएको छ ।
विद्यार्थी कल्याण तथा खेलकुद निर्देशनालयले विश्वविद्यालय अनुदान आयोग र शिक्षा मन्त्रालयको निर्देशनअनुसार सूचना जारी गर्दै सो कार्यको प्रगति यथाशीघ्र जानकारी गराउन आग्रह गरेको हो ।
सरकारको निर्णयअनुसार ६० दिनभित्र विद्यालय तथा विश्वविद्यालय परिसरबाट दलीय विद्यार्थी संगठनका संरचना हटाई ९० दिनभित्र स्टुडेन्ट काउन्सिल वा भ्वाइस अफ स्टुडेन्ट संयन्त्र विकास गर्ने लक्ष्य राखिएको छ ।
यस कदमले शिक्षा क्षेत्रमा दलीय हस्तक्षेप घटाई विद्यार्थीको वास्तविक प्रतिनिधित्व र शैक्षिक गुणस्तर सुधार गर्ने अपेक्षा गरिएको छ ।
