काठमाडौं, १४ असार । त्रिवि शिक्षण अस्पताल -टिचिङ- ले करिब ६ महिनादेखि स्थगित स्वास्थ्य बीमा सेवा असार १५ -सोमबार देखि आंशिक रूपमा पुनः सञ्चालन गर्ने भएको छ ।
अस्पतालका अनुसार स्वास्थ्य बीमाअन्तर्गत हाल ओपीडी सेवा मात्रै उपलब्ध हुनेछ । गत माघ १ गतेदेखि ४० करोड रुपैयाँभन्दा बढी बक्यौता र दाबी भुक्तानीमा समस्या देखाउँदै अस्पतालले स्वास्थ्य बीमा सेवा बन्द गरेको थियो ।
पछिल्लो समय स्वास्थ्य बीमा बोर्डले भुक्तानी प्रक्रिया तीव्र बनाएपछि सेवा पुनः सञ्चालन गरिएको अनुमान गरिएको छ । अस्पतालले बीमाअन्तर्गत ओपीडी टिकट बिहान ७ देखि ११ बजेसम्म र दिउँसो १ देखि २:३० बजेसम्म वितरण हुने जनाएको छ ।
साथै, बीमासम्बन्धी जानकारी वा समस्याका लागि स्वास्थ्य बीमा तथा सामाजिक सुरक्षा शाखामा सम्पर्क गर्न सेवाग्राहीलाई अनुरोध गरेको छ ।
