जनकपुर, १२ असार । धनुषाको क्षिरेश्वरनाथ नगरपालिका–१ स्थित राजदेवी मन्दिर अगाडि रहेको चार्जिङ स्टेशन नजिक अज्ञात समूहले कुटपिट गर्दा चार जना घाइते भएका छन् ।
घटनामा नागेन्द्र मण्डल, दिनेश कुमार शाह, शतिष मण्डल र एक जनाको नाम उपलब्ध नभएको सहित चार जना घाइते भएको उपचारका लागि अस्पताल पुगेका रिजिवि अन्सारीले जानकारी दिए ।
घाइतेहरूको उपचार प्रोशिक अस्पताल जनकपुरमा भइरहेको बताइएको छ । यता इलाका प्रहरी कार्यालय महेन्द्रनगरका अनुसार घटनामा चार जना घाइते भएको प्रारम्भिक जानकारी प्राप्त भएको छ ।
कार्यालयका एक प्रहरी अधिकृतले आफू कार्यालयमा भर्खरै पुगेको र घटनाको विस्तृत विवरण संकलन भइरहेको बताए ।
कुटपिटमा संलग्न व्यक्तिहरूको पहिचान खुल्न बाँकी रहेको प्रहरीले जनाएको छ । घटनाको कारण र संलग्न व्यक्तिहरूको खोजी तथा अनुसन्धान जारी रहेको प्रहरीले जनाएको छ ।
