महोत्तरी, १२ असार । महोत्तरीको पिपरा गाउँपालिकाको नवनिर्मित प्रशासकीय भवन ‘जनता दरबार’को जनता समाजवादी पार्टी (जसपा) नेपालका संरक्षक महन्थ ठाकुरले निरीक्षण भ्रमण गरेका छन्।
निरीक्षणका क्रममा ठाकुरले भवनको संरचना, सेवा प्रवाहका लागि गरिएको व्यवस्थापन तथा भौतिक पूर्वाधारको अवलोकन गरेका थिए।
उनले स्थानीय सरकारलाई प्रभावकारी र नागरिकमैत्री सेवा प्रवाहका लागि आधुनिक तथा व्यवस्थित प्रशासकीय भवनको महत्त्व रहेको उल्लेख गरेका थिए।
भ्रमणका अवसरमा पिपरा गाउँपालिका अध्यक्ष रामजानकी यादव, प्रमुख प्रशासकीय अधिकृत सन्तोष मिश्रा तथा गाउँपालिकाका कर्मचारीहरूको उपस्थिति रहेको थियो।
उपस्थित पदाधिकारीहरूले नवनिर्मित ‘जनता दरबार’ भवनबाट स्थानीयवासीलाई सहज, छिटोछरितो र गुणस्तरीय सेवा प्रदान गर्न गाउँपालिका प्रतिबद्ध रहेको बताएका थिए।
नवनिर्मित ‘जनता दरबार’ भवन सञ्चालनमा आएपछि गाउँपालिकाको प्रशासनिक सेवा थप व्यवस्थित र प्रभावकारी हुने अपेक्षा गरिएको छ।
