जनकपुर, ११ असार । धनुषाका १८ स्थानीय तहमध्ये जनकपुरधाम उपमहानगरपालिका, कमला नगरपालिका र विदेह नगरपालिकाले कानुनले तोकेको समयभित्र नगरसभा गर्न सकेका छैनन् ।
जनकपुरधाममा मेयर मनोज साह विदेशमा रहेका कारण, विदेह नगरपालिकामा अघिल्लो आर्थिक वर्षको हिसाब फस्र्योट नहुँदा तथा कमला नगरपालिकामा जनप्रतिनिधिबीचको विवादका कारण नगरसभा हुन नसकेको सम्बन्धित जनप्रतिनिधिहरूले बताएका छन् ।
स्थानीय सरकार सञ्चालन ऐनअनुसार असार ३० गतेभित्र बजेट पारित गरिसक्नुपर्ने व्यवस्था छ । धनुषाका अधिकांश अन्य स्थानीय तहले भने नगरसभा सम्पन्न गरिसकेका छन् भने केहीले बजेटसमेत पारित गरिसकेका छन् ।
