काठमाडौं, ९ असार । सडक पेटीमा स्वरोजगार गर्दै आएका दृष्टिविहीन व्यवसायीहरूले आफ्नो रोजगारीको सुनिश्चितता र वैकल्पिक व्यवस्थाको माग गर्दै काठमाडौंको माइतीघरमा धर्ना दिएका छन् ।
मंगलबार आयोजित प्रदर्शनमा सहभागी दृष्टिविहीनहरूले सरकारी निकायहरूले सडक पेटीमा सञ्चालन गरिरहेको आफ्नो व्यवसायमा पटक–पटक हस्तक्षेप तथा धरपकड गरेको गुनासो गरेका छन् ।
उनीहरूले यस्तो कार्यले जीविकोपार्जनको माध्यम नै संकटमा परेको बताए । सडक पेटीमा व्यवसाय सञ्चालन गर्नु आफ्नो रोजाइ नभई परिस्थितिजन्य बाध्यता भएको उनीहरूको भनाइ छ । घाम, पानी, धुलो र अन्य कठिनाइ सहँदै पनि जीविकोपार्जनका लागि सडकलाई कार्यक्षेत्र बनाउनुपरेको भन्दै उनीहरूले सम्मानजनक र दिगो विकल्पको व्यवस्था गर्न सरकारसँग माग गरेका छन् ।
प्रदर्शनकारीहरूले पर्याप्त वैकल्पिक व्यवस्था नगरी आफूहरूलाई कार्यस्थलबाट हटाउन खोजिएको आरोप लगाएका छन् । उनीहरूले रोजगारीको अधिकार सुनिश्चित गर्दै उपयुक्त स्थान र अवसर उपलब्ध गराउन सम्बन्धित निकायसँग आग्रह गरेका छन् ।
