काठमाडौं, ३१ भदौ । राष्ट्रिय स्वतन्त्र पार्टी (रास्वपा)का सांसद रमेश प्रसाईंले विपद्का बेला सरकार प्रभावकारी रूपमा प्रस्तुत हुन नसकेको भन्दै प्रतिनिधिसभामा सरकारको ध्यानाकर्षण गराएका छन्।
प्रतिनिधिसभाको बैठकमा बोल्दै उनले अत्यावश्यक खाद्यवस्तुको मूल्य बढेको, बजारमा कालोबजारी तथा मनपरी भइरहेको आरोप लगाए। प्याज, चिनी, चामल र तेलजस्ता दैनिक उपभोग्य वस्तुको मूल्य वृद्धिले सर्वसाधारण प्रभावित भएको उनको भनाइ थियो।
नवनियुक्त उद्योगमन्त्रीलाई शुभकामना दिँदै प्रसाईंले कालोबजारी नियन्त्रणमा प्रभावकारी कदम चाल्न आग्रह गरे। साथै, राजधानीको सार्वजनिक यातायातमा क्षमताभन्दा बढी यात्रु राखेर सञ्चालन भइरहेको भन्दै उनले गृह तथा यातायात मन्त्रालयको ध्यानाकर्षण गराए।
उनले ट्राफिक व्यवस्थापन र सार्वजनिक यातायात सुधारमा सरकारको भूमिका प्रभावकारी हुनुपर्नेमा जोड दिए।
