काठमाडौं, १८ कात्तिक । गृहमन्त्री सुदन गुरुङले नेपाल प्रहरीलाई नागरिकमैत्री व्यवहार अपनाउँदै प्रहरी र जनताबीचको दूरी अन्त्य गर्न निर्देशन दिएका छन् ।
नवनियुक्त ३४औँ प्रहरी महानिरीक्षक (आईजीपी) को दर्ज्यानी चिह्न सुशोभन समारोहलाई सम्बोधन गर्दै उनले नागरिकप्रति सम्मानजनक व्यवहार गर्न र प्रहरी सेवालाई प्रभावकारी बनाउन नयाँ नेतृत्वलाई आग्रह गरेका हुन् ।
गुरुङले शान्ति सुरक्षा, अपराध नियन्त्रण, विपद् व्यवस्थापन तथा नागरिक सेवामा सक्रिय भूमिका निर्वाह गर्न निर्देशन दिँदै विशेषगरी फिल्डमा खटिने प्रहरी जवानहरूको मनोबल उच्च राख्नुपर्नेमा जोड दिए ।
प्रहरी संगठनलाई आवश्यक स्रोतसाधन उपलब्ध गराउन गृह मन्त्रालय तयार रहेको उल्लेख गर्दै उनले कामका क्रममा आउने समस्या समाधानमा मन्त्रालयले सहयोग गर्ने प्रतिबद्धता जनाए ।
यसअघि गृहसचिवले आईजीपीलाई दर्ज्यानी चिह्न लगाइदिने परम्पराभन्दा फरक यसपटक गृहमन्त्री गुरुङ आफैँले नयाँ प्रहरी महानिरीक्षकलाई दर्ज्यानी चिह्न लगाइदिएका थिए ।
