काठमाडौं, ४ आसार । मानव बेचबिखनको आशंकामा त्रिभुवन अन्तर्राष्ट्रिय विमानस्थलबाट २७ जना महिलालाई विदेश जानबाट रोकिएको छ ।
प्राप्त सूचनाका आधारमा विमानस्थल प्रहरीले उनीहरूलाई नियन्त्रणमा लिएर थप अनुसन्धानका लागि काठमाडौं उपत्यका अपराध अनुसन्धान कार्यालयलाई जिम्मा दिएको हो ।
कार्यालयका सन्तोष खड्काका अनुसार ती महिलाहरू पीडित भएको प्रारम्भिक निष्कर्ष छ । अनुसन्धानका क्रममा उनीहरूलाई ओमन लैजाने भन्दै भिजिट भिसामा कुवेत पठाउने तयारी गरिएको खुलेको छ ।
घटनामा संलग्न गिरोहको खोजी तथा थप अनुसन्धान भइरहेको प्रहरीले जनाएको छ ।
