काठमाडौं, ४ असार । औद्योगिक क्षेत्र व्यवस्थापन लिमिटेडले भाडा तथा विभिन्न महसुल लामो समयदेखि नतिरेका ६३ उद्योगको पानी र विद्युत् सेवा बुधबारबाट काट्न सुरु गरेको छ ।
देशभरका १० औद्योगिक क्षेत्रका उद्योगमाथि गरिएको कारबाहीको पहिलो दिनमै करिब १० करोड रुपैयाँ बक्यौता असुल भएको लिमिटेडले जनाए । सबैभन्दा बढी २४ उद्योग बालाजु औद्योगिक क्षेत्र मा रहेका छन् ।
लाइन काटिएपछि बक्यौता रकम भुक्तानी गरेका ८ उद्योगको सेवा पुनः जडान गरिएको छ । तीमध्ये बालाजुका ४, पाटनका २, पोखराका १ र नेपालगञ्जका १ उद्योग रहेका छन् ।
हालसम्म ६३ मध्ये ८ उद्योगको सेवा पुनः सञ्चालनमा आए पनि बाँकी ५५ उद्योगको पानी तथा विद्युत् लाइन अझै काटिएको अवस्थामा छ । लिमिटेडले बिहीबार पनि बक्यौता नतिर्ने अन्य उद्योगमाथि यस्तै कारबाही जारी रहने बताए ।
