काठमाडौं, २९ जेठ । परराष्ट्रमन्त्री शिशिर खनाल आउँदो आइतबारदेखि चारदिने औपचारिक चीन भ्रमणमा जाने भएका छन् ।
उनी चिनियाँ विदेशमन्त्री वाङ यी को निमन्त्रणामा जेठ ३१ गतेदेखि असार ३ गतेसम्म चीनमा रहनेछन् । परराष्ट्र मन्त्रालयका अनुसार भ्रमणका क्रममा बेइजिङमा मन्त्री खनाल र उनका चिनियाँ समकक्षी वाङ यीबीच द्विपक्षीय वार्ता हुनेछ ।
वार्तामा नेपाल–चीन सम्बन्धलाई थप मजबुत बनाउने तथा आर्थिक, व्यापारिक र विकास सहकार्यका विभिन्न पक्षमा छलफल केन्द्रित हुने अपेक्षा गरिएको छ । भ्रमण अवधिमा मन्त्री खनालले चीन सरकारका उच्चस्तरीय पदाधिकारीहरूसँग शिष्टाचार भेटवार्ता गर्ने कार्यक्रम पनि रहेको छ ।
यसबाट दुई देशबीचको कूटनीतिक सम्बन्धलाई थप उचाइमा पु¥याउने विश्वास गरिएको छ । त्यसैगरी, बेइजिङस्थित नेपाली राजदूतावासले आयोजना गर्ने लगानी सम्मेलनमा सहभागी हुँदै उनले नेपालमा वैदेशिक लगानी आकर्षित गर्ने विषयमा आफ्ना धारणा राख्नेछन् ।
सम्मेलनमा चिनियाँ व्यवसायीहरूसँग प्रत्यक्ष अन्तरक्रिया गर्दै नेपालका लगानीयोग्य क्षेत्र, सम्भावना र अवसरबारे जानकारी गराउने कार्यक्रम तय गरिएको छ । भ्रमणका क्रममा नेपाली राजदूतावासद्वारा आयोजित स्वागत समारोहमा पनि मन्त्री खनाल सहभागी हुनेछन् । उक्त अवसरमा उनले चीनमा रहेका नेपाली समुदायका प्रतिनिधिहरूसँग भेटघाट तथा संवाद गर्नेछन् ।
