जनकपुर, २८ जेष्ठ। मधेश प्रदेश सभाको बैठकमा बोल्दै जनमत पार्टीका सांसद शम्भु साहले मधेश प्रदेशमा उच्च प्राविधिक शिक्षाको विकासका लागि मधेश इन्स्टिच्युट अफ इन्जिनियरिङ र मधेश इन्स्टिच्युट अफ मेडिकल स्थापना गर्नुपर्ने बताएका छन्।
प्रदेश सरकारको नीति तथा कार्यक्रममाथिको छलफलमा सहभागी हुँदै सांसद साहले मधेशका विद्यार्थीहरू गुणस्तरीय प्राविधिक तथा चिकित्साशास्त्र अध्ययनका लागि प्रदेश बाहिर जान बाध्य रहेको उल्लेख गरे।
उनले प्रदेशमै उच्चस्तरीय शैक्षिक संस्था स्थापना भए दक्ष जनशक्ति उत्पादन हुनुका साथै शिक्षाका लागि हुने पलायन पनि रोक्न सकिने बताए।
सांसद साहले इन्जिनियरिङ र मेडिकल शिक्षालाई प्रदेशको विकाससँग प्रत्यक्ष रूपमा जोडिएको क्षेत्र भएको उल्लेख गर्दै यस्ता संस्थाको स्थापनालाई सरकारको प्राथमिकतामा राख्न आग्रह गरे।
उनले मधेशलाई शिक्षा, स्वास्थ्य तथा प्राविधिक जनशक्ति उत्पादनको केन्द्रका रूपमा विकास गर्न आवश्यक नीतिगत र बजेटीय व्यवस्था गर्न पनि सरकारको ध्यानाकर्षण गराए।
उनले प्रदेश सरकारलाई दीर्घकालीन सोचका साथ उच्च शिक्षामा लगानी बढाउन र युवाहरूलाई प्रदेशमै अवसर सिर्जना गर्ने कार्यक्रम ल्याउन आग्रह गरेका छन्।
