काठमाडौं, २८ जेठ । झापा प्रहरीले अदालतको फैसला कार्यान्वयन अभियान अन्तर्गत पछिल्ला दुई दिनमा विभिन्न मुद्दाका २४ फरार प्रतिवादीलाई पक्राउ गरेका छन् ।
प्रहरीका अनुसार पक्राउ परेका २० जनाको फैसला कार्यान्वयन हुँदा कुल ५ वर्ष ३ महिना ६ दिन कैद सजाय र ६ लाख रुपैयाँभन्दा बढी जरिवाना असुलउपर हुनेछ । उनीहरूलाई जिल्लाका विभिन्न स्थानबाट पक्राउ गरी अदालतमा उपस्थित गराइएको छ ।
पक्राउ परेकामध्ये अधिकांश लागुऔषध सम्बन्धी मुद्दाका प्रतिवादी छन् । साथै बैंकिङ कसुर, चेक अनादर, नागरिकता किर्ते, चोरी र बहुविवाह मुद्दाका फरार व्यक्तिहरू पनि नियन्त्रणमा परेका छन् । प्रहरीले अदालतका फैसला प्रभावकारी रूपमा कार्यान्वयन गर्न तथा फरार रहने प्रवृत्ति नियन्त्रण गर्न विशेष अभियान जारी राखेको जनाएको छ ।
जिल्ला प्रहरी कार्यालय झापाकी प्रहरी उपरीक्षक वशुन्धरा खड्काका अनुसार कानुनी शासन सुदृढ गर्न फरार प्रतिवादी पक्राउ अभियानलाई प्राथमिकता दिइएको छ ।
