काठमाडौं, ५ वैशाख। राष्ट्रिय स्वतन्त्र पार्टी (रास्वपा)का सांसदहरूले प्रस्तावित प्रधानन्यायाधीश डा. मनोजकुमार शर्माको संसदीय सुनुवाई प्रक्रिया थप ढिलाइ नगरी पारदर्शी, वस्तुनिष्ठ र द्रुत रूपमा अघि बढाउन माग गरेका छन्।
मंगलबार बसेको संसदीय सुनुवाई समितिको बैठकमा रास्वपाका प्रमुख सचेतक कविन्द्र बुर्लाकोटीसहित सांसदहरू डा. लेखजंग थापा र राजीव खत्रीले सुनुवाई प्रक्रियालाई प्रभावकारी बनाउन सुझाव दिएका हुन्।
प्रमुख सचेतक बुर्लाकोटीले उजुरीकर्तासँग क्रमशः छलफल गर्दै प्रस्तावित प्रधानन्यायाधीशको कार्ययोजना पनि सँगसँगै सुन्नुपर्ने बताएका छन्। उनले सुनुवाईको निष्कर्ष पहिले नै तय भएको जस्तो टिप्पणी गलत भएको उल्लेख गर्दै वस्तुनिष्ठ छलफलका आधारमा मात्र निर्णय हुनुपर्ने धारणा राखे।
सांसद डा. लेखजंग थापाले कार्ययोजना कागजमै सीमित नभई व्यवहारमा लागू हुनुपर्नेमा जोड दिए। उनले न्यायिक क्षेत्रमा डिजिटलाइजेशन, मुद्दा फर्स्योटमा तीव्रता र गुणस्तर सुधार सकारात्मक पक्ष भएको बताए।
त्यस्तै सांसद राजीव खत्रीले उजुरी अध्ययन र छलफललाई ‘फास्ट ट्र्याक’मा लैजानुपर्ने धारणा राख्दै समितिले थप सक्रिय भएर समयमै निष्कर्ष निकाल्नुपर्ने बताएका छन्।
