जनकपुर, ३ जेष्ठ । तत्मा बौद्धिक समाज नेपाल धनुषाले आगामी जेठ २३ र २४ गते जनकपुरमा आयोजना गर्न लागेको तत्मा सम्मेलनको तयारीलाई तीव्र बनाएको छ ।
सम्मेलनलाई सफल बनाउन समाजका पदाधिकारी तथा प्रतिनिधिहरू यतिबेला मधेश प्रदेशका विभिन्न जिल्लामा भ्रमण तथा भेटघाट कार्यक्रममा सक्रिय रहेका छन् ।
समाजका अध्यक्ष ई. राम बाबु दासको नेतृत्वमा रहेको टोलीले पछिल्ला दिनहरूमा सप्तरी र सिरहाका स्वजातीय समुदायसँग भेटघाट तथा छलफल गरेको जनाएको छ ।
भ्रमणका क्रममा सम्मेलनको उद्देश्य, समुदायको एकता, शिक्षा, सामाजिक जागरण तथा संगठन विस्तारबारे व्यापक अन्तरक्रिया गरिएको बताइएको छ ।
आज टोलीले सिरहाको चोहर्वा तथा बाराका विभिन्न स्थानमा पुगेर स्वजातीय अगुवासँग भेटघाट गरेको छ । कार्यक्रममा सम्मेलनमा बढीभन्दा बढी सहभागिता सुनिश्चित गर्न आग्रह गरिएको थियो ।
साथै समुदायको हकहित, पहिचान र सामाजिक सशक्तीकरणका विषयमा समेत छलफल भएको समाजले जनाएको छ । आयोजकका अनुसार जनकपुरमा हुने सम्मेलनमा मधेशका विभिन्न जिल्लाबाट ठूलो संख्यामा प्रतिनिधि तथा समुदायका अगुवाको सहभागिता रहने समाजले जनाएको छ ।
उक्त टोलीमा समाजका उपाध्यक्ष उपेन्द्र शासी दास, कोषध्यक्ष राम वृक्ष दास, सदस्य सरोज दास, सदस्य राम नन्दन दासलगायतको उपस्थिति रहेको छ ।
