जनकपुर, २७ वैशाख। तत्मा बौद्धिक समाज नेपाल धनुषाले आगामी जेठ २३ र २४ गते आयोजना हुन लागेको तत्मा सम्मेलनको तयारीलाई तीव्र बनाएको छ।
सम्मेलनलाई व्यवस्थित, प्रभावकारी तथा भव्य रूपमा सम्पन्न गर्ने उद्देश्यले आइतबार एक महत्वपूर्ण बैठक सम्पन्न भएको हो।
समाजका अध्यक्ष इ. राम बाबू दासको अध्यक्षतामा बसेको बैठकले सम्मेलनको तयारीका विभिन्न पक्षलाई व्यवस्थित गर्न सर्वसम्मत रूपमा दुई वटा उपसमिति गठन गर्ने निर्णय गरेको जनाएको छ।
बैठकले समुदायको इतिहास, पहिचान, योगदान तथा सामाजिक महत्त्वलाई उजागर गर्ने उद्देश्यले “स्वजातिको महिमा लेखन उपसमिति” गठन गरेको छ।
उक्त उपसमितिको संयोजकमा रामजी दासलाई चयन गरिएको छ भने सदस्यहरूमा बिनोद दास, राम नन्दन दास, राजेश कुमार दास र कुलदिप दास रहेका छन्।
त्यसैगरी सम्मेलनको आर्थिक व्यवस्थापन सहयोग संकलन तथा कार्यक्रम सञ्चालनलाई प्रभावकारी बनाउन “आर्थिक उपसमिति” समेत गठन गरिएको छ।
यस उपसमितिको संयोजकमा अध्यक्ष राम बाबू दास रहेका छन् भने सदस्यहरूमा उपेन्द्र दास शशि, राम वृक्ष दास, राम नन्दन दास तथा निर्गुन कुमार दासलाई जिम्मेवारी दिइएको छ।
बैठकमा सहभागीहरूले सम्मेलनलाई समुदायको एकता, पहिचान, शिक्षा तथा सामाजिक सशक्तीकरणको महत्वपूर्ण अवसरका रूपमा लिनुपर्ने धारणा राखेका थिए।
