काठमाडौं, ३ वैशाख । नेपाल यातायात व्यावसायी राष्ट्रिय महासंघले बढ्दो इन्धन मूल्यका कारण सार्वजनिक यातायात भाडा पुनः समायोजन गर्न सरकारसँग माग गरेका छन् ।
महासंघका महासचिव डेकनाथ गौतमद्वारा जारी विज्ञप्तिमा पछिल्लो भाडा समायोजनपछि नै दुई पटक इन्धनको मूल्य बढेको उल्लेख गर्दै भाडा पुनः समायोजन गर्न वा मूल्यवृद्धि फिर्ता लिन आग्रह गरिएको छ ।
विज्ञप्तिमा मध्यपूर्व क्षेत्रमा जारी द्वन्द्वका कारण नेपाल आयल निगमले पटक–पटक डिजेल र पेट्रोलको मूल्य बढाएको जनाइए । यसले यात्रुवाहक तथा मालवाहक सवारी सञ्चालनमा थप दबाब र कठिनाइ सिर्जना गरेको महासंघले जानकारी दिए ।
महासंघले चैत २७ र वैशाख २ गते भएको पछिल्लो मूल्यवृद्धि उल्लेख गर्दै २०६५ सालदेखि लागू गरिएको वैज्ञानिक प्रणालीअनुसार पेट्रोलियम पदार्थमा पाँच प्रतिशतभन्दा बढी मूल्यवृद्धि हुँदा स्वचालित रूपमा भाडा समायोजन हुनुपर्ने माग दोहो¥याएको छ ।
साथै, देशभर सेवा सञ्चालन गरिरहेका सदस्य व्यवसायीहरूलाई इन्धन खपत घटाउन र सञ्चालन खर्च व्यवस्थापन गर्न पनि महासंघले आग्रह गरेको छ। सरकारसँग वैकल्पिक व्यवस्था खोज्नुपर्ने मागसमेत विज्ञप्तिमा गरिएको छ ।
