जनकपुर, ११ चैत । जनकपुरको प्रमुख व्यापारिक केन्द्रमध्ये एक मानिने पेठिया बजार अहिले व्यवस्थापनको अभावमा अस्तव्यस्त बन्दै गएको छ ।
दैनिक सयौँ व्यापारी तथा ग्राहकको चहलपहल रहने यस बजारमा व्यापारीहरू सडकमै पसल थापेर व्यापार गर्न बाध्य भएका छन्, जसले बजारको स्वरूप नै अव्यवस्थित बनेको छ ।
स्थानीय व्यापारीका अनुसार बजार सञ्चालनको जिम्मा लिएका ठेकेदारले नियमित रूपमा उनीहरूबाट शुल्क असुल्ने गरेका छन्, तर त्यसअनुसारको सेवा र व्यवस्थापन भने उपलब्ध गराएका छैनन् ।
हामीले पैसा तिर्छौँ, तर कुनै बिल दिइँदैन, न त व्यवस्थित ठाउँ नै मिलाइन्छ, एक व्यापारीले गुनासो गरे । उनीहरूका अनुसार सडकमै पसल राख्नुपर्ने बाध्यता हटाउन ठोस पहल भएको छैन ।
पेठिया बजार करिब एक करोड एघार लाख रुपैयाँमा ठेक्का लागेको बताइए पनि त्यसअनुसारको पूर्वाधार, सरसफाइ, र व्यवस्थित स्टल व्यवस्थापन देखिएको छैन ।
सडक नै व्यापार गर्ने स्थान बनेपछि पैदल यात्रु र सवारी साधन दुवैलाई समस्या भइरहेको छ । विशेषगरी व्यस्त समयमा सवारी जाम अत्यधिक हुने गरेको स्थानीयले बताएका छन् ।
यस अवस्थाले जनकपुर उपमहानगरपालिकाको भूमिकामाथि पनि प्रश्न उठेको छ । स्थानीय सरकारको तर्फबाट बजारको अनुगमन, व्यवस्थापन तथा ठेकेदारको कामको मूल्यांकन प्रभावकारी रूपमा हुन नसकेको आरोप लाग्दै आएको छ ।
त्यसैगरी ठेकेदारको लापरवाही पनि उत्तिकै देखिएको छ । व्यापारिक कर उठाउने तर बजारलाई व्यवस्थित बनाउन कुनै ठोस योजना नलागु गर्ने प्रवृत्तिले समस्या झन् जटिल बनेको छ ।
व्यापारीहरूले उचित स्थान, बिल प्रणाली, र सुरक्षित व्यापारिक वातावरणको माग गरेका छन् । यदि समयमै बजार व्यवस्थापनमा सुधार नगर्ने हो भने भविष्यमा झन् ठूलो समस्या निम्तिन सक्ने स्थानीयको चेतावनी छ ।
सम्बन्धित निकायले तत्काल ध्यान दिई बजारलाई व्यवस्थित, सुरक्षित र पारदर्शी बनाउन पहल गर्नु आवश्यक देखिन्छ ।
Coming Soon…..Kp Report
