जनकपुर, ६ चैत । आन्तरिक सरकारकी प्रधानमन्त्री शुशीला कार्कीले पहिलो पटक जानकी मन्दिर मा पुगेर पूजा-अर्चना गरेकी छन् ।
जनकपुर भ्रमणका क्रममा उनले प्रसिद्ध धार्मिक स्थल जानकी मन्दिरमा विधिपूर्वक पूजा गर्दै देशमा शान्ति, समृद्धि र स्थायित्वको कामना गरिन् ।
प्रधानमन्त्री बनेपछि उनको यो पहिलो जनकपुर भ्रमण हो । विशेषगरी मिथिला संस्कृतिको प्रमुख आस्थाको केन्द्रका रूपमा रहेको जानकी मन्दिरमा उनले केही समय बिताउँदै धार्मिक वातावरणको अनुभवसमेत लिइन् ।
मन्दिर परिसरमा उपस्थित सर्वसाधारण र भक्तजनसँग उनले संक्षिप्त भेटघाट पनि गरेकी थिइन् । सञ्चारकर्मीहरूसँगको कुराकानीमा प्रधानमन्त्री कार्कीले जानकी मन्दिरको सरसफाइ र व्यवस्थापनमा अझ ध्यान दिनुपर्ने आवश्यकता औंल्याइन् ।
उनले मन्दिरजस्तो ऐतिहासिक तथा धार्मिक महत्व बोकेको स्थानमा सधैं स्वच्छता र अनुशासन कायम रहनुपर्ने बताइन् । उनले आफ्नो भ्रमणलाई राजनीतिक भन्दा धार्मिक आस्थासँग जोडेर व्याख्या गरिन् ।
म यहाँ कुनै राजनीतिक उद्देश्यले नभई व्यक्तिगत आस्था र श्रद्धाका कारण आएको हुँ, उनले भनिन् ।
प्रधानमन्त्री कार्कीले धार्मिक स्थलहरूको संरक्षण र प्रवद्र्धनमा सरकारको पनि ध्यान जानुपर्ने संकेत गर्दै सांस्कृतिक सम्पदाको जगेर्ना सबैको साझा जिम्मेवारी भएको बताइन् ।
