काठमाडौं, २ चैत । पेट्रोलियम पदार्थको मूल्यवृद्धिपछि नेपाल यातायात व्यवसायी राष्ट्रिय महासंघले सार्वजनिक यातायातको भाडा तत्काल समायोजन गर्न सरकारसँग माग गरेको छ ।
नेपाल आयल निगमले डिजेलमा प्रतिलिटर १० रुपैयाँ र पेट्रोलमा १५ रुपैयाँ मूल्य बढाएपछि महासंघले विरोध जनाउँदै भाडा समायोजन आवश्यक भएको जनाएको हो ।
महासचिव डकनाथ गौतमका अनुसार सार्वजनिक यातायात इन्धनमा निर्भर हुने भएकाले मूल्यवृद्धिले व्यवसायमा प्रत्यक्ष असर परेको छ ।
महासंघले २०७८ फागुनपछि भाडा समायोजन नभएको उल्लेख गर्दै वैज्ञानिक विधिअनुसार संघीय र प्रदेशस्तरबाट यथाशीघ्र नयाँ भाडादर निर्धारण गर्न सरकारसँग आग्रह गरेको छ ।
