काठमाडौं, १ चैत । बालुवाटारमा बसेको मन्त्रिपरिषद् बैठकले विभिन्न महत्वपूर्ण निर्णयहरू गरेको छ ।
बैठकका निर्णयहरू सरकारका प्रवक्ता तथा गृहमन्त्री ओमप्रकाश अर्यालले सार्वजनिक गरेका हुन् । बैठकले भदौ २३–२४ का घटनासम्बन्धी जाँचबुझ आयोगको प्रतिवेदन ग्रहण गर्ने निर्णय गरेको छ ।
साथै राष्ट्रिय सभाको रिक्त सदस्य पदमा अर्याललाई नियुक्त गर्न रामचन्द्र पौडेल समक्ष सिफारिस गर्ने निर्णय पनि गरिएको छ ।
त्यसैगरी पश्चिम एसियाली युद्ध प्रभावित मुलुकहरूमा रहेका तथा ट्रान्जिटमा अलपत्र नेपालीको राहत र उद्धारलाई प्रभावकारी बनाउन विभिन्न नेपाली राजदूतावास र महावाणिज्य दूतावासलाई आवश्यक व्यवस्था मिलाउन निर्देशन दिइएको छ ।
बैठकले हिमनदी क्षेत्रमा सम्भावित हिमताल विस्फोटजन्य बाढी तथा जलवायु परिवर्तनजन्य जोखिम न्यूनीकरणका लागि संयुक्त राष्ट्रसंघीय विकास कार्यक्रम मार्फत हरित जलवायु कोष बाट प्राप्त हुने करिब २ करोड ४२ लाख अमेरिकी डलर बराबरको अनुदान सहायता स्वीकार गर्ने निर्णय पनि गरेको छ ।
