काठमाडौं, २३ असोज । सरकारले चाडपर्वका समयमा स्वास्थ्य, खानेपानी, विद्युत्, दूरसञ्चार, विमानस्थल, यातायात र अस्पताललगायत अत्यावश्यक सेवा नियमित सञ्चालन गर्न सम्बन्धित निकायलाई निर्देशन दिएको छ।
प्रधानमन्त्री तथा मन्त्रिपरिषद्को कार्यालयका प्रवक्ता हेमराज अर्यालले शुक्रबार प्रेस ब्रिफिङमार्फत आवश्यक जनशक्ति, औषधि तथा उपकरण तयारी अवस्थामा राख्न र नागरिकलाई सेवा लिन अनावश्यक सास्ती नदिन निर्देशन दिइएको जानकारी दिए।
यसैबीच, सरकारले स्वदेशी तथा विदेशी लगानी बढाउन लगानीसम्बन्धी सेवा सरल, पारदर्शी र समयबद्ध बनाउने तयारी गरेको छ। यसका लागि ‘राष्ट्रिय एक्सप्रेस लगानी प्रणाली सञ्चालन तथा व्यवस्थापन कार्यविधि’को मस्यौदा तयार भइरहेको प्रवक्ता अर्यालले बताए।
उक्त कार्यविधिले लगानी प्रक्रिया सहज र व्यवस्थित बनाउँदै स्वदेशी तथा विदेशी लगानी प्रवर्द्धनमा सहयोग पुग्ने सरकारको अपेक्षा छ।
