जनकपुर २२ फागुन । विवादका कारण रोकिएको धनुषा–१ को मतगणना पुनः सुरु गर्न निर्वाचन आयोगले निर्देशन दिएको छ ।
आयोगको बैठकले मतगणना अघि बढाउन सम्बन्धित निर्वाचन अधिकृतलाई आवश्यक निर्देशन दिएको हो । आयोगले राष्ट्रिय स्वतन्त्र पार्टीका उम्मेदवार किशोरी शाह कमलको चुनाव चिह्न घण्टीमा स्वस्तिक छाप लागेको मतपत्र भेटिएमा त्यस्ता मत पनि गणना गरी छुट्टै लगत राख्न भनेको छ ।
बाँकी मतपत्र भने नियमानुसार गणना गरी परिणाम सार्वजनिक गर्न निर्देशन दिइएको छ । उम्मेदवार ऋणको कालोसूचीमा परेको भन्दै आयोगले उनको उम्मेदवारी खारेज गरेको थियो ।
त्यसपछि मतगणनामा विवाद उत्पन्न भएको थियो । आयोगको निर्देशनपछि गणना पुनः सुरु भएको छ । हालसम्म नेकपा एमालेका राम चन्द्र मण्डल ९६ मतसहित अगाडि छन् ।
