जनकपुर, १४ फागुन । धनुषा निर्वाचन क्षेत्र नम्बर ३ का बिमलेन्द्र निधि जो नेपाली कांग्रेसका प्रतिनिधिसभा सदस्य पदका उम्मेदवार हुन्, उनले जनकपुर उपमहानगरपालिका वडा नम्बर १६ मा मुस्लिम समुदायसँग भेटघाट तथा अन्तरक्रिया कार्यक्रम सम्पन्न गरेका छन् ।
भेटघाटका क्रममा उम्मेदवार निधिले लोकतन्त्र, समावेशिता र नागरिक अधिकारको रक्षा गर्न नेपाली कांग्रेसको चुनाव चिह्न ‘रुख (गाछी)’ मा मतदान गर्न मतदातालाई आग्रह गरे ।
उनले भने, “जसरी मानिसलाई बाँच्न अक्सिजन आवश्यक हुन्छ, त्यसरी नै जनताको अधिकार सुरक्षित गर्न रुखमा मतदान आवश्यक छ । कार्यक्रममा स्थानीय मुस्लिम समुदायका अगुवा, बुद्धिजीवी र मतदाताहरूको उल्लेखनीय उपस्थिति रहेको थियो ।
भेटघाटका क्रममा उम्मेदवार निधिले कांग्रेसले सधैं अल्पसंख्यक, दलित र पिछडिएको समुदायको अधिकारका लागि आवाज उठाउँदै आएको दाबी गरे ।
कार्यक्रमकै क्रममा एक भावुक दृश्य पनि देखिएको थियो । एक मतदाताले भावुक हुँदै भने, “हामी कांग्रेसी हौँ, हाम्रो अधिकार नै कांग्रेस हो ।” उक्त अभिव्यक्तिले कार्यक्रमस्थलमा उपस्थित समर्थकहरूलाई उत्साहित बनाएको थियो ।
स्थानीयवासीहरूले यस क्षेत्रको विकास, रोजगारी, शिक्षा र सामाजिक न्यायका विषयमा आफ्ना अपेक्षा राख्दै निधिसँग प्रत्यक्ष संवाद गरेका थिए ।
उम्मेदवार निधिले आफू निर्वाचित भए जनताको आवाज संसदमा सशक्त रूपमा उठाउने प्रतिबद्धता व्यक्त गरे ।
