काठमाडौं, १३ फागुन । २१ फागुनमा हुने प्रतिनिधिसभा निर्वाचन बहिष्कारको आरोपमा प्रहरीले देशभरबाट ४२ जनालाई पक्राउ गरेको छ ।
तीमध्ये हाल १४ जना मात्रै हिरासतमा रहेको नेपाल प्रहरीले जनाएको छ । प्रहरीका केन्द्रीय प्रवक्ता तथा डीआईजी अविनारायण काफ्लेका अनुसार केहीलाई सम्झाइ–बुझाइपछि र केहीलाई अदालतको आदेशमा रिहा गरिएको हो ।
अदालतको आदेशपछि नागरिक बचाउ महाअभियानका संयोजक दुर्गा प्रसाईं र नेपाल कम्युनिष्ट पार्टीका महासचिव ऋषि कटेल पनि छुटिसकेका छन् ।
हाल हिरासतमा विभिन्न कम्युनिस्ट समूह र राजावादी पक्षका व्यक्तिहरू रहेका छन् । सुरक्षा निकायका अनुसार देशभर कम्तीमा १२ वटा समूह निर्वाचन बहिष्कारमा सक्रिय छन्, जसबाट सुरक्षा चुनौती हुनसक्ने निष्कर्ष निकालिएको छ ।
कम्युनिस्टदेखि राजावादी समूहसम्मलाई निगरानीमा राखिएको प्रहरीले जनाएको छ ।
