काठमाडौं, १३ फागुन । राजावादी अभियन्ता तथा व्यवसायी दुर्गा प्रसाईं १३ पटक पक्राउ परेपछि सर्वोच्च अदालतको बन्दी प्रत्यक्षीकरण आदेशअनुसार आज थुनामुक्त भएका छन् ।
हिजो सर्वोच्च अदालतले थुनामुक्त गर्न आदेश दिएपछि प्रक्रिया पूरा गरी उनी रिहा भएका हुन् । निर्वाचन भाँड्ने गतिविधि गरेको आरोपमा निर्वाचन आयोगको पत्राचारपछि प्रहरीले उनलाई पक्राउ गरेको थियो ।
रिहाइपछि सञ्चारकर्मीसँग कुरा गर्दै प्रसाईंले देश गलत दिशातर्फ गइरहेको दाबी गरे र चुनाव तथा सुरक्षा निकायको भूमिकामाथि प्रश्न उठाए ।
उनले राजासमेत सडकमा उत्रिन सक्ने दाबी गर्दै सरकार र प्रशासनलाई चुनौती दिए । साथै, नेपाली कांग्रेस सभापति शेरबहादुर देउवाकी पत्नी आरजु देउवा तथा अन्य नेताहरूसँगको तस्बिर पुरानो भएको स्पष्ट पार्दै तस्बिरको अर्थ नहुने बताए ।
उनले केपी ओली र प्रचण्डसँग पनि तस्बिर खिचेको उल्लेख गरे ।
