काठमाडौं, ४ फाल्गुन । निर्वाचन प्रचारप्रसारका लागि आवश्यक रकम खर्च गर्न हालसम्म कुल उम्मेदवारमध्ये करिब २० प्रतिशतले मात्र बैंक खाता खोलेका छन् ।
निर्वाचन आयोगका अनुसार ३ हजार ४०६ उम्मेदवारमध्ये ६७१ जनाले मात्रै बैंक खाता खोलेका हुन् । आयोगका प्रवक्ता नारायणप्रसाद भट्टराईले प्रचारप्रसार खर्च अनिवार्य रूपमा बैंक खातामार्फत नै जम्मा र खर्च गर्नुपर्ने व्यवस्था लागू गरिएको जानकारी दिए ।
यसैबीच नेपाल राष्ट्र बैंकले उम्मेदवारहरूको बैंक खाता खोल्न सहजीकरण गर्न बैंक तथा वित्तीय संस्थालाई परिपत्र जारी गरेको छ ।
साथै मतदाता शिक्षा प्रभावकारी बनाउन बैंकका मोबाइल एप, एटीएम र डिजिटल डिस्प्लेमा मतदाता शिक्षा सामग्री राख्न आयोगले अनुरोध गरेको छ ।
