काठमाडौं, ३० असोज । नेपाल प्रहरीका महानिरीक्षक दानबहादुर कार्कीले कठिन परिस्थितिमा समेत नागरिकको सुरक्षा, जनसेवा र कानुनी शासन कायम गर्न प्रहरी प्रतिबद्ध रहेको बताएका छन्।
७१औँ प्रहरी दिवसका अवसरमा शुक्रबार आयोजित कार्यक्रममा उनले प्रहरी सङ्गठनलाई सक्षम, उत्तरदायी र प्रविधिमैत्री बनाउने प्रतिबद्धता व्यक्त गरे। उनका अनुसार राष्ट्र र नागरिकको सुरक्षाका क्रममा हालसम्म १ हजार ७९८ प्रहरी कर्मचारीले ज्यान गुमाएका छन्।
महानिरीक्षक कार्कीले भोटेकोशी–त्रिशूली बाढीमा तीन प्रहरी कर्मचारीको मृत्यु भएको र २५ जना बेपत्ता भएको जानकारी दिए। विपद्का बेला प्रहरीले अन्य सुरक्षा निकायसँग सहकार्य गर्दै खोज, उद्धार तथा मानवीय सहायतामा अग्रपङ्क्तिमा रहेर काम गरेको उनले बताए।
उनका अनुसार गत वर्ष क्षतिग्रस्त भएका ४५९ प्रहरी कार्यालयमध्ये ४५३ वटाको पुनर्निर्माण सम्पन्न भई सञ्चालनमा आएका छन्। उनले अमर प्रहरीको योगदानको स्मरण गर्दै घाइते तथा अशक्त प्रहरी कर्मचारीको योगदानको उच्च सम्मानसमेत व्यक्त गरे।
