काठमाडौं, ३० असोज । गृहमन्त्री सुधन गुरुङले राज्यका संवेदनशील सूचना चुहाउनेमाथि कारबाही गरिने बताएका छन्।
उनले सरकारी सूचनाको गोपनीयता कायम राख्न र जिम्मेवारी पूर्वक काम गर्न नेपाल प्रहरीलाई निर्देशन दिएका छन्। ७१औँ प्रहरी दिवसका अवसरमा शुक्रबार काठमाडौंमा आयोजित कार्यक्रममा बोल्दै उनले नेपाल प्रहरीलाई व्यावसायिक, सक्षम र आधुनिक बनाउन कानुनी सुधार तथा सेवासुविधा वृद्धि गर्ने तयारी भइरहेको बताए।
गुरुङले अन्तरदेशीय अपराध नियन्त्रण र अनुसन्धानमा प्रहरीलाई थप सक्षम बनाउनुपर्ने उल्लेख गर्दै प्रहरीको बर्दी नागरिकका लागि डर नभई भरोसा र सुरक्षाको प्रतीक बन्नुपर्ने बताए।
उनका अनुसार विपद् उद्धारमा खटिने सुरक्षाकर्मीका लागि जोखिम भत्ता र खाजा खर्चको व्यवस्था गरिएको छ। प्रहरीको जनशक्ति बढाउन दरबन्दी थप्ने प्रस्तावसमेत अघि बढाइएको उनले जानकारी दिए।
गृहमन्त्री गुरुङले प्रहरीलाई नागरिकमैत्री व्यवहार अपनाउन र अपराध नियन्त्रणमा शून्य सहनशीलताको नीति कार्यान्वयन गर्न निर्देशन दिए।
