जनकपुर, ३ फाल्गुन । आज हिन्दु धर्मावलम्बीहरूको प्रमुख पर्व महाशिवरात्रि देशभर श्रद्धा, भक्ति र उल्लासका साथ मनाइँदै छ ।
फागुन कृष्ण चतुर्दशीका दिन मनाइने यस पर्वलाई भगवान् शिवको अत्यन्त प्रिय दिनका रूपमा लिने गरिन्छ । धार्मिक विश्वासअनुसार यही रात भगवान् शिव प्रकट भएको स्मरणमा महाशिवरात्रि मनाइने परम्परा छ ।
पुराणहरूमा महाशिवरात्रिलाई कालरात्रि, मोहरात्रि, सुखरात्रि र शिवरात्रि गरी चार प्रमुख पवित्र रात्रिमध्ये एकका रूपमा वर्णन गरिएको छ ।
यस दिन व्रत, पूजा, ध्यान तथा शिव आराधना गर्नाले दुःख, कष्ट र पाप नाश भई आत्मिक शुद्धि प्राप्त हुने जनविश्वास रहँदै आएको छ । विशेष गरी दुःखी तथा कष्टपूर्ण जीवन बिताइरहेका प्राणीहरूको हृदयमा धर्म र सद्बुद्धिको उदय गराउने दिनका रूपमा यस पर्वलाई लिने गरिन्छ ।
महाशिवरात्रिको अवसरमा मधेशका प्रमुख धार्मिकस्थलहरूमध्ये एक जलेश्वरनाथ महादेव मन्दिरमा साधुसन्त र भक्तजनहरूको बाक्लो उपस्थिति देखिएको छ । मन्दिर परिसरमा विभिन्न स्थानबाट आएका बाबाहरूले धुनी बालेर साधना गरिरहेका छन् भने शिवभक्तहरू बिहानैदेखि दर्शनका लागि लामो लाइनमा उभिएका छन् ।
सुरक्षा र व्यवस्थापनलाई ध्यानमा राख्दै स्थानीय प्रशासन र मन्दिर व्यवस्थापन समितिले आवश्यक तयारी गरेको जनाइएको छ । महाशिवरात्रिको अवसरमा विशेष पूजा, अभिषेक तथा धार्मिक कार्यक्रमहरू पनि आयोजना गरिएका छन् ।
