काठमाडौँ, २ फाल्गुन । यही फागुन २१ गते हुने प्रतिनिधिसभा निर्वाचनका लागि राष्ट्रिय प्रजातन्त्र पार्टी (राप्रपा) ले शनिबार आफ्नो चुनावी घोषणापत्र सार्वजनिक गरेको छ ।
पार्टी केन्द्रीय कार्यालयमा आयोजित कार्यक्रममा अध्यक्ष राजेन्द्र लिङ्देन ले ‘संकल्प पत्र’ सार्वजनिक गर्दै दीर्घकालीन राष्ट्रिय सोच प्रस्तुत गरेका हुन् ।
घोषणापत्रमा राप्रपाले सबल, समृद्ध र समुन्नत नेपाल निर्माण आफ्नो दीर्घकालीन लक्ष्य रहेको उल्लेख गरेको छ । पुँजी निर्माण, दिगो आर्थिक वृद्धि, शिक्षा र स्वास्थ्यमा निःशुल्क पहुँच, सामाजिक सुरक्षा, सामाजिक न्याय, युवाकेन्द्रित उत्पादनमुखी अर्थतन्त्र र व्यापक रोजगारी सिर्जना प्रमुख प्राथमिकतामा राखिएको छ ।
राप्रपाले २०८७ सम्म नेपाललाई मध्यम आयस्तरको मुलुक बनाउने लक्ष्य लिएको उल्लेख गर्दै गुणस्तरीय शिक्षा–स्वास्थ्य, गरीबी न्यूनीकरण, प्रविधि विकास, दिगो पूर्वाधार, प्रभावकारी सार्वजनिक सेवा र प्राकृतिक स्रोतको संरक्षणमा जोड दिएको छ ।
घोषणापत्रमा वैदिक सनातन धर्म सापेक्ष हिन्दु राष्ट्र स्थापना गर्ने लक्ष्य राख्दै सबै धर्मबिच समानता र धार्मिक स्वतन्त्रता सुनिश्चित गरिने उल्लेख छ । जातीय भेदभाव, छुवाछुत तथा धर्मका आधारमा हुने कुनै पनि भेदभावलाई दण्डनीय बनाइने प्रतिबद्धता पनि जनाइएको छ ।
शासकीय स्वरूपतर्फ राप्रपाले राजसंस्थालाई अभिभावकीय संस्थाका रूपमा पुनःस्थापना, खर्चिलो निर्वाचन प्रणालीमा सुधार, प्रदेश खारेजीसहित केन्द्र र बलियो स्थानीय तहको दुई तहको शासन प्रणाली तथा गैरदलीय स्थानीय तहको अवधारणा अघि सारेको छ ।
