जनकपुर, २९ माघ । रौतहट क्षेत्र नम्बर ४ का प्रतिनिधिसभा उम्मेदवार राजकुमार दास तत्माले जनकपुरमा पत्रकार सम्मेलन गरी आफ्ना चुनावी एजेन्डा सार्वजनिक गरेका छन् ।
उनले सहादतबाट प्राप्त संघीयता जोगाउनु नै आफ्नो प्रमुख राजनीतिक उद्देश्य भएको स्पष्ट पारे । उम्मेदवार दासले विगतका आन्दोलन र सहादतकै बलमा संघीयता आएको उल्लेख गर्दै त्यसलाई कमजोर पार्ने प्रयासहरू भइरहेकाले आफू चुनावी मैदानमा उत्रिएको बताए ।
“अरू उम्मेदवारले वाचा मात्र गर्छन्, हामी काम गरेर देखाउनेछौं,” उनले भने । उनले मधेशी समुदायले राज्यबाट निरन्तर विभेद भोग्दै आएको दाबी गर्दै सोही विभेदको विरुद्ध आवाज उठाउन आफू उम्मेदवार बनेको बताए ।
चपुर क्षेत्रमा मधेशी समुदायमाथि भएको अपमान र हेपाइप्रति आपत्ति जनाउँदै त्यसको प्रतिवाद गर्न आफ्नो उम्मेदवारी रहेको उनको भनाइ थियो ।
दलित समुदायको अवस्थाप्रति गम्भीर ध्यानाकर्षण गराउँदै दासले दलित बस्तीमा खान–बस्नसम्म उपयुक्त ठाउँ नहुनु, जमिनको लालपुर्जा नहुनु जस्ता समस्याहरू समाधान गर्न पहल गर्ने प्रतिबद्धता जनाए ।
उनले अहिलेको राजनीतिक परिवेशमा नयाँ पुस्ताको नेतृत्व आवश्यक रहेको उल्लेख गर्दै, “यति धेरै सहादतपछि अब त्यही पुस्ताको नेतृत्व देशले खोजिरहेको छ,” भने ।
पत्रकार सम्मेलनमा उनले रास्वपा नेता बालेन साह र उनको राजनीतिक दलमाथि पनि टिप्पणी गरे । बालेन प्रधानमन्त्री बन्न चाहे पनि पहिले आफ्नो पार्टीको आन्तरिक व्यवहार सुधार्नुपर्ने उनको धारणा थियो ।
पार्टी नेतृत्वमाथि विभिन्न आरोप लागिरहेको अवस्थामा जनताले कसरी विश्वास गर्ने भन्ने प्रश्न उनले उठाए । झापाबाट उम्मेदवार बनेका बालेन साह चुनाव हार्ने दाबी गर्दै दासले भने, “बालेन झापाबाट जित्दैनन्, लेखेर राख्नुस् ।
” साथै, आफ्नो निर्वाचन क्षेत्रमा कुनै पनि ‘घण्टी’ चिन्हको प्रभाव नरहेको पनि उनले दाबी गरे ।
