जनकपुर, २५ माघ । धनुषा निर्वाचन क्षेत्र नम्बर–४ का प्रतिनिधिसभा उम्मेदवार महेन्द्र यादव यतिबेला घरदैलो अभियानमा सक्रिय देखिएका छन् ।
चुनावी प्रचारलाई तीव्र बनाउने क्रममा उनले आज मिथिला बिहारी नगरपालिका–१० मा मतदातासँग प्रत्यक्ष भेटघाट तथा संवाद गरेका छन् ।
घरदैलो कार्यक्रममा उम्मेदवार यादवले स्थानीयको समस्या, आवश्यकता र अपेक्षाबारे जानकारी लिँदै आफू निर्वाचित भएपछिको योजनाबारे मतदातालाई अवगत गराएका थिए ।
उनले क्षेत्रको विकास, रोजगारी सिर्जना र आधारभूत सेवा विस्तारलाई प्राथमिकतामा राखेर काम गर्ने प्रतिबद्धता व्यक्त गरेका छन् ।
कार्यक्रममा नेपाली कांग्रेस धनुषा जिल्ला सभापति योगेन्द्र पजियार, कांग्रेस नेता कुमारकान्त झा, सन्तोष यादव, चन्द्रमोहन यादवलगायत पार्टीका नेता तथा कार्यकर्ताको उल्लेखनीय उपस्थिति रहेको थियो ।
सहभागी नेताहरूले उम्मेदवार यादवलाई जिताउन एकजुट भएर लाग्न कार्यकर्तालाई आग्रह गरेका थिए । स्थानीय मतदाताहरूले पनि आफ्नो समस्या र सुझाव राख्दै उम्मेदवारसँग खुला संवाद गरेका थिए ।
घरदैलो कार्यक्रम आगामी दिनहरूमा पनि निरन्तर जारी रहने जनाइएको छ ।
