बुटवल, २६ माघ । राष्ट्रिय स्वतन्त्र पार्टी (रास्वपा) का सभापति रवि लामिछाने आज रुपन्देहीमा रहँदै पाँचै निर्वाचन क्षेत्रमा जनसम्पर्क कार्यक्रम गर्दैछन् ।
आइतबार साँझ रुपन्देही आइपुगेका लामिछाने आज बिहान देवदह खैरेनीबाट कार्यक्रम सुरु गर्ने पार्टीले जनाएको छ । रास्वपा रुपन्देही सभापति डा. बुद्धिप्रसाद शर्माका अनुसार लामिछाने दिनभर २६ स्थानमा पुग्ने कार्यक्रम छ ।
उनी भैरहवा, कोटहीमाई–मर्चवार, पर्सहवा, मोतिपुर, बुटवललगायत स्थान हुँदै साँझ बुद्ध जन्मस्थल लुम्बिनी र मायादेवी मन्दिर पुग्नेछन् ।
सबै स्थानमा औपचारिक सम्बोधन नहुने र केही स्थानमा मात्र छोटो सम्बोधन हुने पार्टीले जनाएको छ । रुपन्देहीका कार्यक्रम सकेर लामिछाने सोमबार राति कपिलवस्तु जाने कार्यक्रम छ ।
