जनकपुर, २६ माघ । मैथिली कला र संगीत क्षेत्रमा पछिल्लो समय उल्लेखनीय सक्रियता देखिन थालेको छ ।
यही क्रमलाई निरन्तरता दिँदै जनकपुरका स्थानीय गायक तथा कलाकार हिमेश चौधरीको नयाँ मैथिली गीत ‘गुलाबी गुलाबी’ सार्वजनिक भएको छ। यो गीत फेब्रुअरी ४ तारिखका दिन युट्युबमार्फत औपचारिक रूपमा रिलिज गरिएको हो ।
रोमान्टिक भावनाले भरिएको यस गीतमा गायक हिमेश चौधरीसँगै स्नातक तहकी विद्यार्थी सिम्रनको आकर्षक अभिनय देख्न सकिन्छ। गीतका शब्द र स्वर स्वयं हिमेश चौधरीकै रहेको छ भने यसको संगीत संयोजन दीपेन्द्र साहले गरेका हुन् ।
सरल शब्द, मिठो धुन र युवापुस्तालाई छुने भावनाले गीतलाई थप प्रभावशाली बनाएको छ । ‘गुलाबी गुलाबी’को म्युजिक भिडियो ड्रिम तस्विर ब्यानर अन्तर्गत निर्माण गरिएको हो । भिडियोको प्राविधिक पक्षलाई उच्च प्राथमिकता दिइएको देखिन्छ ।
भिडियो सम्पादन हिमांशु पटेल र लभ चौधरीले गरेका छन् भने छायांकन अंकित ठाकुरले गरेका हुन्। त्यस्तै कला निर्देशन आदर्श साह, पोशाक डिजाइन रन्जिता तथा क्रिएशन तथा शीर्षक डिजाइन अनुराग साहले गरेका छन् ।
युवा पुस्तालाई विशेष रूपमा लक्षित गरी तयार पारिएको यस गीतले रिलिज भएको केही दिनमै सामाजिक सञ्जालमा राम्रो चर्चा बटुल्न सफल भएको छ ।
गीतबारे प्रतिक्रिया दिँदै गायक हिमेश चौधरीले भनेका छन्, “यस गीतमार्फत हामी युवा पुस्तालाई संगीत र कलामार्फत रमाइलो अनुभूति दिन चाहन्छौं ।
साथै, केही सकारात्मक सन्देश पनि दिन खोजेका छौं। दर्शक–श्रोताले मन पराइदिनु हुनेछ भन्ने विश्वास छ । गीत सार्वजनिक भएको दिनदेखि नै युट्युबमा हजारौं दर्शकले हेरिसकेका छन् ।
कमेन्टमार्फत दर्शकहरूले गीतका शब्द, संगीत र अभिनयको खुलेर प्रशंसा गरिरहेका छन् ।
