काठमाडौँ, २५ माघ । सरकारले आजदेखि देशभर कक्षा ६ मा अध्ययनरत किशोरी तथा विद्यालय बाहिर रहेका १० वर्ष उमेर समूहका किशोरीलाई पाठेघरको मुखको क्यान्सरविरुद्धको एचपीभी खोप अभियान सुरु गरेको छ । अभियान फागुन १५ गतेसम्म सञ्चालन हुनेछ ।
स्वास्थ्य सेवा विभागका अनुसार गत वर्ष खोप छुटेका कक्षा ७ देखि १० का किशोरी र ११–१४ वर्षका विद्यालय बाहिरका किशोरीलाई पनि यसै अभियानअन्तर्गत खोप लगाइनेछ ।
हिमाली तथा हिउँ पर्ने जिल्लामा भने अभियान चैतमा सञ्चालन हुनेछ । स्वास्थ्य अधिकारीहरूले एचपीभी खोप शतप्रतिशत प्रभावकारी रहेको बताउँदै सबै लक्षित किशोरीलाई खोप लगाउन आग्रह गरेका छन् ।
नेपालमा पाठेघरको मुखको क्यान्सर महिलामा देखिने प्रमुख क्यान्सरमध्ये एक हो, जसलाई एचपीभी खोपबाट रोक्न सकिन्छ ।
