काठमाडौं, २५ माघ । राष्ट्रिय सभामा कार्यकाल सकिन लागेका सांसदहरूले बिदाइ सम्बोधन गर्ने भएका छन् ।
फागुन २० मा कार्यकाल सकिने सांसदहरूले सोमबारदेखि संसद्मा आफ्ना अनुभूति राख्नेछन् । समय अभावका कारण माघ २८ सम्म सम्बोधन प्रक्रिया जारी रहनेछ ।
यसपटक १९ जना सांसद बिदा हुँदैछन् । तीमध्ये एक मनोनीत सांसद वामदेव गौतमले राजीनामा दिइसकेका छन् भने दुई सांसद प्रतिनिधिसभा निर्वाचनमा उम्मेदवार बनेका कारण बाहिरिएका छन् ।
बाँकी १६ जनाले बिदाइ सम्बोधन गर्नेछन् । प्रतिनिधिसभा निर्वाचन नजिकिएकाले राष्ट्रिय सभाको अधिवेशन लम्ब्याइने छैन। सरकारले चैत १ गतेदेखि नयाँ संसद्को अधिवेशन सुरु गर्ने तयारी गरेको छ ।
