एजेन्शी, । अस्ट्रेलियाका अनुभवी तीव्र गतिका बलर जोश हेजलवुड चोटका कारण टी–२० विश्वकप क्रिकेटबाट बाहिरिएका छन्।
हामस्ट्रिङ इन्जुरीबाट पूर्ण रूपमा निको हुन नसकेपछि उनलाई विश्वकप खेल्न नदिने निर्णय गरिएको क्रिकेट अस्ट्रेलियाले जनाएको छ । हेजलवुडको अनुपस्थितिले अस्ट्रेलियाली बलिङ आक्रमणमा प्रभाव पर्ने अपेक्षा गरिएको छ, किनकि उनी पछिल्ला वर्षहरूमा टोलीका प्रमुख तीव्र बलरमध्ये एक रहँदै आएका छन्।
चोटबाट समयमै फिट हुन नसक्दा विश्वकप खेल्ने उनको आशा अधुरो बनेको हो । टी–२० विश्वकपमा अस्ट्रेलिया समूह ‘बी’ मा परेको छ। यस समूहमा श्रीलंका, जिम्बाब्वे, ओमान र आयरल्यान्ड छन्।
अस्ट्रेलियाले आफ्नो पहिलो खेल फेब्रुअरी ११ मा आयरल्यान्डविरुद्ध श्रीलङ्काको आर. प्रेमदासा क्रिकेट स्टेडियममा खेल्नेछ । हेजलवुडको स्थानमा टोली सन्तुलन मिलाउन अस्ट्रेलियाले केही नयाँ अनुहारलाई विश्वकप टोलीमा समेटेको छ ।
स्पिनर म्याथ्यु कुह्नेमन, अलराउन्डर कूपर कोनोली र तीव्र गतिका बलर जेवियर बार्टलेटलाई पहिलो पटक टी–२० विश्वकप खेल्ने अवसर दिइएको छ ।
