काठमाडौँ, २२ माघ । आगामी फागुन २१ गते हुने प्रतिनिधिसभा निर्वाचनको पूर्वसन्ध्यामा राष्ट्रिय मानव अधिकार आयोगले निर्वाचन आचारसंहिता उल्लंघनका घटना बढ्दै गएको भन्दै गम्भीर चिन्ता व्यक्त गरेको छ ।
आयोगले राजनीतिक दल, उम्मेदवार, सञ्चारमाध्यम तथा सरोकारवाला सबै पक्षलाई निर्वाचन मर्यादित, निष्पक्ष र मानव अधिकारमैत्री बनाउन सचेत रहन आग्रह गरेको छ ।
आयोगले पछिल्लो समय गरेको अनुगमन तथा सरोकारवालासँगको छलफलका क्रममा राजनीतिक दलका नेता तथा उम्मेदवारहरूले एक–अर्काप्रति अमर्यादित भाषा प्रयोग गर्ने, व्यक्तिगत आक्षेप लगाउने र घृणाजन्य अभिव्यक्ति दिने प्रवृत्ति बढ्दै गएको पाइएको जनाएको छ ।
यस्ता गतिविधिले निर्वाचन वातावरणलाई नकारात्मक बनाउनुका साथै सामाजिक सद्भावमा समेत असर पार्ने आयोगको ठहर छ । राष्ट्रिय मानव अधिकार आयोगका अनुसार डिजिटल प्रविधिको दुरुपयोग गरी अरूको मानमर्दन हुने सामग्री उत्पादन तथा प्रचारप्रसार गर्ने क्रम तीव्र बन्दै गएको छ ।
सामाजिक सञ्जालमार्फत गलत सूचना, भ्रमपूर्ण सामग्री र अपमानजनक अभिव्यक्ति फैलाउने कार्यले निर्वाचन आचारसंहिताको उल्लंघन हुनुका साथै मानव अधिकारको हनन भइरहेको आयोगले जनाएको छ ।
आयोगले कतिपय सञ्चारमाध्यमहरूले निर्वाचनअघि नै कुनै उम्मेदवारको जित सुनिश्चित भएको जस्तो गरी समाचार सम्प्रेषण गर्दा मतदातामा भ्रम सिर्जना भएको उल्लेख गरेको छ । साथै, मतदाता शिक्षा प्रभावकारी रूपमा सञ्चालन हुन नसक्दा गलत सूचनाको प्रभाव बढेको आयोगको भनाइ छ ।
