वीरगञ्ज, २० पुस । धनुषामा मस्जिद तोडफोड र कुरान जलाएको घटनाको विरोधमा आइतबार वीरगञ्जमा भएको प्रदर्शन उग्र बन्दा स्थिति तनावग्रस्त बनेको छ ।
प्रदर्शन नियन्त्रणमा लिन प्रहरीले ५ राउण्ड अश्रुग्यास प्रहार गरेको छ । धनुषाको कमला नगरपालिका–६ सखुवा मरानस्थित मस्जिदमा शनिबार तोडफोड र धार्मिक ग्रन्थ जलाइएको घटनाको विरोधमा वीरगञ्जका मुस्लिम समुदायले टायर बाल्दै प्रदर्शन गरेका थिए ।
प्रदर्शनका क्रममा प्रहरीमाथि ढुङ्गामुढा हुनुका साथै छपकैया प्रहरी बिटमा तोडफोड भएपछि प्रहरीले स्थिति नियन्त्रणमा लिएको हो । पर्सा प्रहरीका डीएसपी राजु कार्कीका अनुसार भीड आक्रामक बनेपछि अश्रुग्यास प्रयोग गर्नुपरेको हो ।
हाल वीरगञ्जको अवस्था सामान्य रहेको जिल्ला प्रहरी कार्यालय पर्साले जनाएको छ । प्रदर्शनकारीले जनकपुर घटनाका दोषीमाथि कडा कारबाहीको माग गरेका छन् ।
प्रहरीका अनुसार घटनाको सुरुआत सामाजिक सञ्जालमा पोस्ट गरिएको एक भिडियोबाट भएको थियो । भिडियो पोस्ट गर्ने दुई युवकलाई प्रहरीले नियन्त्रणमा लिए पनि त्यसपछि आक्रोशित समूहले मस्जिदमा आक्रमण गरेको धनुषा प्रहरी प्रमुख रुग्म कुँवरले बताए ।
