झापा, १९ पुष । बिर्तामोड नगरपालिका–४ स्थित एककिलोमिटर क्षेत्रबाट प्रहरीले लागुऔषधसहित तीन जनालाई पक्राउ गरेको छ ।
इलाका प्रहरी कार्यालय अनारमनी र लागुऔषध नियन्त्रण ब्युरो काँकरभिट्टाको संयुक्त टोलीले बिहीबार राति दमकका तीन जना युवालाई पक्राउ गरेको हो ।
पक्राउ पर्नेमा दमक–४ का २३ वर्षीय राजा माझी, दमक–१ का २९ वर्षीय टेकबहादुर कुमाल र दमक–१ का ३३ वर्षीय हर्कबहादुर कुमाल रहेका छन् ।
उनीहरूको साथबाट खैरो हिरोइनजस्तो देखिने ६ ग्राम १५० मिलिग्राम पदार्थ, प्रतिबन्धित औषधि ५५ ट्याब्लेट र तीन थान मोबाइल फोन बरामद गरिएको प्रहरीले जनाएको छ । पक्राउ परेकाहरूलाई इप्रका अनारमनीमा राखी थप अनुसन्धान भइरहेको छ ।
