काठमाडौँ, १८ पुस । सरकार र डा. निकोलस भुसाल तथा हरिश विष्टबीच ६ बुँदे सहमति भएपछि उनीहरूले जारी राखेको आमरण अनशन ११ औँ दिनमा तोडिएको छ ।
शुक्रबार भएको सहमतिपछि प्रधानमन्त्री सुशीला कार्कीले बालुवाटारमा दुवैलाई जुस खुवाएर अनशन तोडाएकी हुन् । प्रधानमन्त्रीको सचिवालयका अनुसार सरकार, डा. निकोलस भुसाल र हरिश विष्टबीच भएको सहमतिपत्रमा प्रधानमन्त्रीका मुख्य सल्लाहकार अजयभद्र खनालले सरकारको तर्फबाट हस्ताक्षर गरेका छन् ।
सहमतिपत्रमा उल्लेखित बुँदाहरू कार्यान्वयन गर्ने प्रतिबद्धता सरकारले जनाएको छ । डा. भुसाल र विष्टले आगामी फागुन २१ गतेका लागि तय गरिएको प्रतिनिधिसभा निर्वाचन रोक्नुपर्ने, प्रत्यक्ष निर्वाचित कार्यकारी प्रमुखको व्यवस्था गर्नुपर्ने, भ्रष्टाचारमा संलग्न व्यक्तिहरूमाथि कडा कारबाही गर्नुपर्ने लगायतका माग अघि सार्दै काठमाडौँको माइतीघर मण्डलामा आमरण अनशन सुरु गरेका थिए ।
अनशनका क्रममा उनीहरूको स्वास्थ्य अवस्थाबारे चासो बढ्दै गएपछि विभिन्न नागरिक समाज, अधिकारकर्मी तथा राजनीतिक वृत्तबाट पनि सरकारसँग वार्ता गरेर समस्या समाधान गर्न दबाब बढ्दै गएको थियो । अन्ततः सरकार र अनशनरत पक्षबीच सहमति जुटेपछि अनशन अन्त्य भएको हो ।
सरकारले सहमतिपत्रमा समेटिएका विषयहरूबारे आवश्यक अध्ययन, छलफल र कानुनी प्रक्रिया अघि बढाउने बताएको छ । अनशन तोडिएसँगै समर्थकहरूले राहतको महसुस गरेका छन् भने अब सम्झौताका बुँदाहरू कार्यान्वयन हुन्छन् कि हुँदैनन् भन्ने विषयमा सबैको ध्यान केन्द्रित भएको छ ।
