काठमाडौं, १४ पुस । प्रतिनिधिसभा निर्वाचनका लागि राजनीतिक दलहरूले समानुपातिकतर्फका उम्मेदवारहरूको बन्दसूची बुझाउने आज अन्तिम दिन रहेको छ ।
निर्वाचन आयोगले तय गरेको निर्वाचन कार्यतालिकाअनुसार सोमबार कार्यालय समयभित्र दलहरूले आफ्नो बन्दसूची आयोगमा पेस गरिसक्नुपर्नेछ ।
आगामी फागुन २१ गते हुने प्रतिनिधिसभा निर्वाचनका लागि आयोगले आइतबारदेखि समानुपातिकतर्फको बन्दसूची बुझाउने प्रक्रिया सुरु गरेको थियो ।
सो अवधिमा केही राजनीतिक दलहरूले आफ्नो उम्मेदवार सूची आयोगमा दर्ता गराइसकेका छन् भने बाँकी दलहरू आज सूची बुझाउने तयारीमा छन् ।
निर्वाचन आयोगका अनुसार बन्दसूची बुझाउँदा समावेशीता, लैङ्गिक सन्तुलन तथा कानुनले तोकेको मापदण्ड पूरा गर्नुपर्नेछ । बन्दसूची दर्ता भएपछि आयोगले प्रारम्भिक जाँच गरी आवश्यक परे सच्याउन समय दिनेछ ।
समानुपातिक प्रणालीअन्तर्गत दलहरूले प्राप्त गर्ने मतका आधारमा उम्मेदवार चयन हुने व्यवस्था छ ।
