जनकपुर, १४ पुस। मधेश केन्द्रित दल जनता समाजवादी पार्टी (जसपा) नेपाल र लोकतान्त्रिक समाजवादी पार्टी (लोसपा) नेपालबीच एकीकरण गर्ने निर्णय भएको छ।
दुवै पार्टीका अध्यक्षहरूले सहमति पत्रमा हस्ताक्षर गरेका छन्। काठमाडौंमा बसेको जसपा अध्यक्ष उपेन्द्र यादव र लोसपा अध्यक्ष महन्थ ठाकुरसहितका पदाधिकारीहरूको संयुक्त बैठकले वर्तमान राजनीतिक परिस्थितिको मूल्यांकन गर्दै एकीकरणको निर्णय गरेको हो।
विज्ञप्तिमा संघीय लोकतान्त्रिक गणतन्त्रलाई संस्थागत गर्दै संघीयता, पहिचान, समानुपातिक समावेशिता, सामाजिक न्यायलगायतका मुद्दालाई मजबुत बनाउँदै न्यायपूर्ण समाज निर्माण गर्ने उद्देश्यसहित एकता गरिएको उल्लेख छ।
२०७७ वैशाख १० गते संघीय समाजवादी पार्टी र राष्ट्रिय जनता पार्टी एकीकरण भएर जसपा बनेको थियो। तर २०७८ भदौमा विभाजन भई ठाकुर नेतृत्वमा लोसपा गठन भएको थियो।
२०६३ सालपछि उपेन्द्र यादव र महन्थ ठाकुर मधेश राजनीतिका प्रभावशाली शक्ति रूपमा उदाएका थिए।
