काठमाडौं, १३ पुष । उज्यालो नेपाल पार्टीका संरक्षक कुलमान घिसिङले देशका वैकल्पिक राजनीतिक शक्तिहरूबीच एकता आवश्यक रहेको बताएको छ ।
एकता सम्भव नभए कम्तीमा साझा एजेन्डामा सहकार्य गरेर अघि बढ्नुपर्ने उनको धारणा छ । पोखरामा आज आइतवार आयोजित कार्यकर्ता भेलालाई सम्बोधन गर्दै घिसिङले सही नेतृत्व र नयाँ राजनीतिक धारका शक्तिहरू एक ठाउँमा उभिनुपर्ने आवश्यकता औँल्याए । उनले सकेसम्म पूर्ण एकता र त्यो सम्भव नभए कार्यगत सहकार्यको बाटो अपनाउनुपर्ने जनाए ।
उनले नेपाली जनताको चाहना पनि यही रहेको उल्लेख गर्दै वैकल्पिक शक्तिहरू एक भएर अघि बढून् र देशलाई नयाँ नेतृत्व प्रदान गरून् भन्ने अपेक्षा जनतामा रहेको बताएको छ । वर्तमान सरकारमा मन्त्रीसमेत रहेका घिसिङले सबैले जनभावनालाई बुझेर त्यसअनुसार कदम चाल्नुपर्नेमा जोड दिए ।
राष्ट्रिय स्वतन्त्र पार्टीका सभापति रवि लामिछाने र काठमाडौं महानगरपालिकाका मेयर बालेन शाहबीच सात बुँदे सहमति सार्वजनिक भएको दिन नै घिसिङको यो अभिव्यक्ति आएको हो । घिसिङले यसअघि बालेन शाहसँग एकता र सहकार्यका विषयमा संवाद अघि बढाएको भए पनि पछिल्लो सहमतिमा आफू सहभागी नभएको देखिएको छ ।
घिसिङले उज्यालो नेपाल पार्टीले आफ्नो सम्मान, आत्मसम्मान र स्वाभिमान कायम राख्दै सबै राजनीतिक शक्तिसँग सहकार्य गर्न तयार रहेको स्पष्ट पारे । यसका लागि आवश्यक तयारी भइरहेको र निकट भविष्यमा त्यसको ठोस परिणाम देखिने विश्वाससमेत उनले व्यक्त गरे । उनले भने, पार्टीले आफ्नो पहिचान र गरिमा जोगाउँदै सहकार्यको बाटो रोज्नेछ र त्यस दिशामा भइरहेका प्रयासले चाँडै सकारात्मक नतिजा दिनेछ भन्नेमा आफू आशावादी रहेको बताए।
