जनकपुर, २ मंसिर । मधेस प्रदेशसभामा प्रतिनिधित्व गर्ने सात दलको विपक्षी गठबन्धनले मंसिर ३ गते प्रदेशसभा बैठक बोलाउन औपचारिक माग गरेका छन् ।
सभामुख रामचन्द्र मण्डलविरुद्ध दर्ता गरिएको ‘पदअनुकूल आचरण नगरेको’ प्रस्ताव अघि बढाउन बैठक आवश्यक रहेको भन्दै विपक्षी सांसदहरूको टोली उपसभामुख बबिता राउतलाई भेट्न पुगेको हो ।
माओवादी केन्द्रका संसदीय दलका नेता भरत साहले ३२ जना प्रदेशसभा सदस्यको हस्ताक्षर सहित उपसभामुख राउतलाई मागपत्र बुझाउँदै बैठक आह्वानको आग्रह गरेका हुन् ।
उनले प्रदेशसभाको २५ प्रतिशत सदस्यले माग गरेमा बैठक बोलाउन सकिने संवैधानिक व्यवस्था रहेको जनाए ।
साहका अनुसार, सभामुखविरुद्ध दर्ता भएको प्रस्तावमाथि प्रदेशसभामार्फत छलफल अघि बढाउन बैठक अत्यावश्यक भएकाले विपक्षी दलहरूले एकताको साथ बैठक बोलाउन आग्रह गरेको हो ।
मधेस प्रदेशसभामा नेपाली कांग्रेस, जसपा नेपाल, जनमत पार्टी, लोसपा, नेकपा (एकीकृत समाजवादी) र माओवादी केन्द्रसहितका दलहरूले बैठक आह्वानको माग अघि सारेका छन् ।
