काठमाडौं, ३० कात्तिक । कैलालीमा प्रहरीले २० ग्राम ६१० मिलिग्राम खैरो हेरोइनसहित नौ जनालाई नियन्त्रणमा लिएको छ ।
जिल्ला प्रहरी कार्यालय तथा मातहतका इकाइबाट खटिएको टोलीले विभिन्न स्थानमा गरिएको चेकजाँचका क्रममा उनीहरूलाई समातेको हो । पक्राउ परेकासँगै चारवटा मोटरसाइकल पनि बरामद गरिएको प्रहरीले बताए ।
धनगढी उपमहानगरपालिका–३ त्रिनगर ब्यारेल नजिकको चेकजाँचमा डडेल्धुराको पर्शुराम नगरपालिका–१० का ३५ वर्षीय गणेशबहादुर डाँगीसहित तीन जना पक्राउ परेका छन् । डाँगीले चलाएको म२प ३१०७ नम्बरको मोटरसाइकलमा सवार डोटीको जोरायल गाउँपालिका–२ की २० वर्षीया डम्मरी भण्डारी र डडेल्धुराको आलीताल गाउँपालिका–३ का ३० वर्षीय डम्मर बोहरा पनि समातिएका हुन् ।
उनीहरूको साथबाट ९ ग्राम २९० मिलिग्राम खैरो हेरोइन फेला परेको छ । त्यस्तै, भजनी नगरपालिका–३ कुसमघाटमा गरिएको चेकजाँचका क्रममा लम्कीचुहा नगरपालिका–१ थकालीपुरका १९ वर्षीय रिजन मगर र २२ वर्षीय आकाश चौधरी पक्राउ परेका छन् ।
उनीहरू सवार सु.प.प्र.०१–००९ प ३५११ नम्बरको मोटरसाइकलबाट ५ ग्राम ४२० मिलिग्राम हेरोइन बरामद गरिएको हो । गोदावरी नगरपालिका–५ गेटामा प्रहरीले से ६ प ७५९४ नम्बरको मोटरसाइकल चालक बिजय बिष्ट र पछाडि सवार राज चौधरीलाई नियन्त्रणमा लिएको छ।
उनीहरूबाट ५ ग्राम ७५० मिलिग्राम खैरो हेरोइन फेला परेको थियो। यसैगरी, लम्कीचुहा नगरपालिका–६ पिपरकोटीका २९ वर्षीय कमल जैसी र २६ वर्षीय लक्ष्मण बोहरा बागमार क्षेत्रबाट पक्राउ परेका छन्। उनीहरूको साथबाट १५० मिलिग्राम हेरोइन बरामद भएको प्रहरीले जनाएको छ।
