जनकपुर, ३० कार्तिक । मधेश प्रदेशका नवनियुक्त मुख्यमन्त्री सरोजकुमार यादवले आफूलाई आन्दोलनकारीतर्फबाट गम्भीर सुरक्षा चुनौती उत्पन्न भएको बताएका छन् ।
मधेश प्रदेशवासीका नाममा शनिबार गरेको सम्बोधनमा उनले सुरक्षा निकायले दिएको रिपोर्टका आधारमा आफ्नो गतिबिधि सीमित गर्न सम्बन्धित निकायले आग्रह गरेको स्पष्ट पारे ।
मुख्यमन्त्री यादवका अनुसार सुरक्षा निकायद्वारा प्राप्त मूल्यांकनमा उनी सहभागी हुने कार्यक्रमहरूको संख्या घटाउनुपर्ने, भीडभाडयुक्त कार्यक्रमहरू टाढा राख्नुपर्ने र संवेदनशील रहनुपर्ने सुझावहरू समावेश छन् ।
उनले सुरक्षा निकायकै निर्देशनअनुसार कार्यक्रमहरू घटाउँदा आलोचना र प्रश्नहरू उठ्न सक्ने भन्दै यस्तो अवस्थाका बारेमा कसलाई गुनासो गर्ने भन्ने प्रश्न समेत उठाए ।
यसै क्रममा मुख्यमन्त्री यादवले आफू सुरक्षित नभए प्रदेशका अन्य दलका सांसद तथा जनप्रतिनिधिहरू पनि सुरक्षा जोखिममा पर्ने चेतावनी दिए ।
उनका शब्दमा, “सुरक्षा थ्रेट मलाई अरू कोबाट हुन्छ ? जनताबाट त हुँदैन, आन्दोलनकारीबाटै हुन्छ । म सुरक्षित छैन भने अन्य माननीयहरू कसरी सुरक्षित हुन्छन्?”
यादवको यो अभिव्यक्ति हाल मधेश प्रदेशमा चलिरहेको आन्दोलन, राजनीतिक तनाव र सुरक्षा व्यवस्थापनका विषयले गम्भीर मोड लिएको सङ्केतका रूपमा हेरिएको छ ।
